Kûçikê Mugdat Esener yê ku 10 roj berê li Yuksekovaya navçeya Hekariyê hat definkirin li ser gora xwediyê xwe disekine ku yên vê rewşê dibînin hestiyar û xemgîn dibin.

Mugdat Esenerê 27 salî li Wanê piştî krîza dil li nexweşxaneyê mir û di 21ê Tîrmehê da li goristana gundê Akocakê ya li navçeya Yuksekovayê hat definkirin.

Esenerê ku bi heywanheziya xwe va dihat nasîn 4 sal berê ji kolanê cêwrikek hilda, xwedî kir û mezin kir.

Kûçikê wî 10 roj e li ser gora wî naçe tu derê ku kesên tên goristanê dema kûçik dibînin hestiyar dibin.

Enes Esenerê birayê Mugdat Esener ji nûçegihanê AAyê ra got kûçik 10 roj e ji goristanê dernakeve û wiha behsa xemgîniya xwe kir: "Birayê min îsal ji Zanîngeha Abant Îzzet Baysalê mezûn bû. Ew demeke nexweş bû. Li Wanê nexweş ket û tevî hewldanên doxtoran a li nexweşxaneyê ji mirinê nefilitî. Mirina wî tesîreke mezin li ser me hemûyan kir."

Esener anî ziman ku birayê wî 4 sal berê cêwrikekî biçûk li kuçeyê dît û mezin kir ku ew piştî mirina wî 10 roj in ku ji gora wî venaqete û wiha dewam kir: "Ev kûçik êdî emanetê birayê min e. Birayê min çawa ku xwedî kiriye û mezin kiriye, her wisa em ê jî lê miqate bibin û mezin bikin. Kûçikekî pir dilsoz û wefa ye. Birayê min pir bimerhemet bû û ji heywanan jî hez dikir. Wî pir baş li vî kûçikî nihêrî û dilê wî hilneda ku ew li kolanan bimîne. Wî bi salan ew li ber mala me xwedî kir. Niha jî ew qet ji gora wî venaqete."