Li Diyarbekirê jinên perwerdeya pîşeyî distînin, kelepora çandî û dîrokî ya bajêr dineqişînin ser kûp û cêrên çêdikin.

Li navçeya navendê Sûrê, 13 jinên beşdarî kursa li Navenda Piştgiriya Malbatê ya Qaymeqamtiya Sûrê (ADEM) bûn, li atolyeya seramîk û derdanên ji heriyê tên çêkirin, li ber destê hîndekarên pispor kûp û cêran çêdikin.

Jin li bajarê qedîm ê 33 şaristanî lê ava bûne, mekanên qedîm ên wekî sûrên dîrokî yên di Lîsteya Kelepora Cihanî ya UNESCOyê da ne, Kompleksê Muzeya Keleha Navxweyî, Mizgefta Mezin, Pireya Dehderî, Xana Hesenpaşa û her wiha fîgurên li ser van mekanan dineqişînin ser kûp û cêrên ku ji heriyê çêdikin.

Jin van kûp û cêrên reng bi reng û celeb celebî datînin ber geştiyarên xwemalî û biyanî da ku biecibînin û ji xwe ra bikirin.

Kordînatora Projeya ADEMê ya Qaymeqamtiya Sûrê Îlknur Demirelê ji peyamnêrê AAyê ra diyar kir ku armanca wan ew e, bi berhemên li atolyeya seramîk û derdanên heriyê tên çêkirin, bajêr bidin nasandin.

Demirelê destnîşan kir, kursiyer sîparîşan li ber destê perwerdekaran amade dikin û wiha dewam kir, “Ji bo Festîvala Rêya Çandê ya Sûrê ya dê di Cotmehê da dest pê bike, mamoste û kursiyerên me amadekariyê dikin. Berhemên dîrokî yên li Diyarbekirê û fîgurên li ser wan dê li ser kûp û cêran bên neqişandin û xebata lansman, pêşangeh û workshop dê bê kirin.”

Kursiyer Aynur Ateşê diyar kir ku ew li kursê perwerdeyeke baş distînin û lewma jî ew dixwazin vê, ji xwe ra bikin pîşe.