VAN (AA) - Li Tuşbaya navçeya Wanê darên behîv û mişmişan yên ku kulîlk vedane qeraxa Gola Wanê dixemilînin û bala welatiyan dikşînin.

Li Taxa Çîtorenê siruşt bi hatina biharê zindî û rengîn bû.

Darên behîv û mişmişan yên ku kulîlk vedane, Çiyayê Sîpanê, Gola Wanê û şînahiya esman bi hev ra dîmenên gelek xweş derdixin holê.

Kesên siruştê hez dikin û wênekêş tên herêmê û li van deran bêhna xwe didin û dîmenan qeyd dikin.

Ji welatiyan Halîl Yetmez ji nûçegihanê AAyê ra daxuyand ku qeraxên Gola Wanê û ev dîmenên xweş gelekî bala wan dikşîne.

Yetmez wiha axivî: "Bi Çiyayê Sîpanê yê bi berf, Gola Wanê û bi darên behîvan yên ku bi kulîlk vedane va dîmeneke bêhempa derketiye holê. Ez heta niha nehatibûm vê derê. Cihekî hêjayî dîtinê ye. Ji ber ku hewa xweş e gelek ziyaretvan tên. Ez vê derê pêşniyarê her kesî dikim."