Wezîrê Karên Derva yê Îranê Huseyîn Mîr Ebdullahiyan got, "Welatê wî beriya ku êrîşî Îsraîlê bike, agahî da Amerîkayê û ragihand ku ew ê baregehên Amerîkayê yên li herêmê û berjewendiyên Amerîkayê nexin hedef."

Li gor malpera nûçeyan a Entexabê, Ebdullahiyan ji bo ku beşdarî civîna Konseya Ewlehiyê ya Neteweyên Yekbûyî (KENY) bibe, çû Amerîkayê û li New Yorkê pirsên rojnamegeran bersivandin.

Ebdullahiyan got, "Beriya operasyonê (ya li dijî Îsraîlê) û piştî (destpêka) operasyonê bi şertê ku seba parastina eskerî piştgiriyê nedin Îsraîlê, me ji Amerîkayê ra eşkere got ku em ê baregehên we û berjewendiyên we nekin hedef."

Wezîrê Îranî diyar kir, ji bo têkiliya navbera her du welatan Îsvîçreyê navbeynkarî kir û wiha dewam kir, "Roja yekşemê piştî operasyonê li gor saeta herêmî me di 02.30yî da ji Amerîkayê ra peyam şand û jê ra got ku em li herêmê pey zêdekirina rageşiyê nînin."