Serokê Amerîkayê Donald Trump ragihand ku civîna wî ya bi serokên Ewropî ra pir baş derbas bûye û piştî vê civînê wî dest bi amadekariyên civîna sêalî ya ku wê bi Serokê Dewleta Rûsyayê Vladîmîr Putîn û Serokê Dewleta Ukraynayê Volodîmîr Zelenskiy ra çêbibe, kiriye.

Serokê Amerîkayê Trump piştî hevdîtinên xwe yên duh yên li Qesra Spî yên hem bi Zelenskiy û hem jî bi rêberên Ewropî ra kirin, li ser hesabê xwe Truth Socialê daxuyaniyek weşand.

Trump navên serokên Ewropî yek bi yek rêz kir û daxuyand ku wî bi wan ra civîneke baş pêk aniye.

Trump wiha behsa civînê kir: "Di civînê da, em li ser garantiyên ewlehiyê yên ji bo Ukraynayê yên ku wê ji hêla welatên curbicûr ên Ewropî va bên pêk anîn û bi Amerîkayê ra jî bi kordîne bê meşandin, sekinîn. Her kes ji ber îhtimala aştiyê ya ji bo Rûsya/Ukraynayê pir kêfxweş e."

Trump destnîşan kir ku wî di dawiya civînan da ji Putîn ra telefon kiriye û wiha got: "Min dest bi amadekariyên civîneke ku cihê wê hîn nehatiye diyarkirin ya di navbera Serokê Dewletê Putîn û Serokê Dewletê Zelenskiy da kiriye. Piştî ku ev hevdîtin pêk were, bi beşdariya min va em ê bi her du serokên dewletan ra civîneke sêalî bikin."