Serokomarê Îranê Mesûd Pezeşkiyan, behsa şerê 12 rojî yê bi Îsraîlê ra kir û got, "Mûşekên wan (Îsraîlî) ji yên me hesastir, pirtir û bihêztir bûn, lê gelê me dijmin bêhêvî kir."

Li gorî IRNAya ajansa nûçeyan a fermî ya Îranê, Pezeşkiyan li civîneke "Tevgera Pêşxistina Edaletê di Perwerdehiyê da" li Xorasana Başûr axivî.

Pezeşkiyan bal kişand ser helwesta bi biryar a gelê Îranê di pevçûna bi Îsraîlê ra û got, "Dijmin amade bû ku welatê me parçe bike, lê hêza gel bû sedema têkçûna wan."

Pezeşkiyan, tekez li ser pêwîstiya hevgirtinê bi gel re kir û wiha got:

"Eger em bi hesasiyeteke mezin ji bo alîkariya gel tevbigerin û bixwazin di şert û mercên heyî da guhertinekê çêbikin, bê guman em ê rêyekê bibînin. Lê eger em li benda biryara Parlamentoyê û çalakiya hikûmetê bin, em ê negihêjin tu derê."