Serokwezîrê Îsraîlê Binyamîn Netanyahu piştî êrîşa asîmanî ya beriya heftiyekî ya li dijî Qeterê, êrîşên xwe yên "devkî" yên dijî Qeterê zêde kirin.

Li gorî nûçeya rojnameyên Yedioth Ahronoth û Maarivê Netanyahu li nivîsgeha xwe ya li rojavayê Qudsê civîneke çapemeniyê li dar xist.

Netanyahu got ku wî rexneyên tund li Qeterê kirine û "di dema şer da ew bi zelalî anîne ziman".

Netanyahu îdîa kir ku "Eger Qeter bixwesta, dikaribû zextek pir bihêztir bikira û ji bo em hemû kesên me yên revandî (girtiyên Îsraîlî) azad bikin, alîkariya me bikira" û îdîa kir ku Qeter bi Hemasê va girêdayî ye, piştgiriyê dide Hemasê, mazûvaniya Hemasê dike û wê fînanse dike.

Netanyahu îdia kir kesê ku li televîzyona Al Jazeera temaşe bike, dê bibîne ku dij-Semîtîzm, dij-Siyonîzm û dij-Amerîkîzmek tê da ye ku bi salan e berdewam e.

Netanyahu, îdia kir ku encamek zelal heye, wan li Qeterê tedbîr girtine û Hamasê cihek ji bo veşartinê nedîtiye, got ku ev peyamek pir xurt e ji bo rêberên Hamasê û dijminên Îsraîlê yên li her derê.

Netanyahu diyar kir ku ti têkiliyên wî yên bazirganî bi Qeterê ra nînin û qet bi vê mijarê ra eleqedar nabe.