Di êrîşên ku artêşa Îsraîlê ji 7ê Cotmeha 2023yan vir va birin ser Xeta Xezeyê da jimara kuştiyan di 24 saetên dawîn da 98 kes zêde bûn û derket 60 hezar û 430yî.

Wezareta Tenduristiyê ya li Xezeyê daxuyaniya nivîskî da û der barê êrîşên Îsraîlê yên ku li Xezeyê dewam dikin da agahiyên dawîn ên kuştî û birîndaran dan.

Ji ber êrîşên Îsraîlê yên dijî Xezeyê di 24 saetên dawîn da 98 Filistînî hatin kuştin û hezar û 79 kes jî birîndar bûn.

Ji 18ê Adarê vir va ku artêşa Îsraîlê agirbesta di 19ê Rêbendanê da hatibû çêkirin, betal kir û li dijî Xezeyê êrîş cardin dan destpêkirin, jimara kuştiyan derket 9 hezar û 246an, jimara birîndaran jî derket 36 hezar û 681ê.

Di êrîşên ku Îsraîlê ji 7ê Cotmeha 2023yan vir va birin ser Xeta Xezeyê da jimara kuştiyan jî derket 60 hezar û 430yî, jimara birîndaran jî derket 148 hezar û 722yan.

Ji 27ê Gulanê vir va li herêmên belavkirina alîkariya însanî ku qaşo di bin navê Îsraîl û Amerîkayê da hatine avakirin, ji ber êrîşên dijî Filistîniyên li benda alîkariyê ne, hejmara kuştiyan derket hezar û 422yan û ya birîndaran jî derket 10 hezar û 67an.

Tê gotin ku hê bi hezaran cinaze di bin kavilan da ne.