Hikûmeta li Xezeyê: Li Nexweşxaneya Şifayê ji ber kêmasiya av û xwarinê însan benda mirinê ne

 Hikûmeta li Xezeyê daxuyand li Nexweşxaneya Şifayê ya ku Îsraîlê dorpêç kiriye ji 7 hezarî zêdetir kesên ji cî û warên xwe bûne û xwe spartine vir, nexweş û xebatkarên tenduristiyê ji ber kêmasiya av û xwarinê li ber mirinê ne.

Ofîsa medyayê ya hikûmetê daxuyaniyeke nivîskî weşand û der barê rewşa li Nexweşxaneya Şifayê da agahî da.

Di daxuyaniyê da hat destnîşankirin ku li Nexweşxaneya Şifayê av, vexwarin û şîrê zarokan nemaye û wiha hat gotin: "Li Nexweşxaneya Şifayê ya ku 650 nexweş û qasî 7 hezar kesên ji cî û warên xwe bûne lê sitîrîne av û vexwarin tune."

- "Rewşa li Nexweşxaneya Şifayê pir bitalûke ye"

Hat daxuyandin ku hêzên Îsraîlê zirar dane hemû wesayîtên Nexweşxaneya Şifayê, rê li ber nexweş û xebatkarên tenduristiyê digirin ku ew dernekevin.

Daxuyaniyê wiha dewam kir: "Nexweş, xebatkarên tenduristiyê û kesên ji cî û warên xwe bûne yên li Nexweşxaneya Şifayê ji ber kêmasiya av û xwarinê li ber mirinê têdikoşin. Rewşa li Nexweşxaneya Şifayê pir bitalûke ye. Ji bo ku kesên ku li nexweşxaneyê bên xelaskirin em banga midaxaleya acil dikin."

Hişyarî hat dayîn û hat gotin ji ber tunebûna ceyranê û kuvozê gelek dergûşên zû hatine dinyayê dibe ku bimirin.

- Cinazeyan birin cihekî nayê ku zanîn

Hat gotin hêzên Îsraîlê Nexweşxaneya Şifayê wek cihekî eskerî bi kar tînin, erdê dikolin, kontrol dikin û cinazeyan jî dibin cihekî ku nayê zanîn.

Hat destnîşankirin Îsraîl dibêje li Nexweşxaneya Şifayê çek hene, lê tu kes ji vê çîrokê bawer nake, divê esker û tank ji nexweşxaneyê vekişin.

Bang li civaka navneteweyî hat kirin ku nexweşxane ji destê artêşa Îsraîlê bê xelaskirin û hat gotin nexweşxane saziyên alîkariyê ne û divê wek dika listikê ya operasyonên eskerî neyên bikaranîn.