Artêşa Îranê ragihand ku bi dronan Amana yekeya îstixbarata eskerî ya Îsraîlê, 8200 siber operasyon û yekeya kartêkirina daneyan û hin baregehên asîmanî kirin armanc.

Artêşa Îranê derbarê êrîşan da daxuyanî da û wiha got:

"Ji bo bîranîna fermandarên ezîz, wêrek û şehîd ên Îranê, vê sibê, Teşkîlata Îstixbaratê ya Amanê, 8200 siber operasyon û yekeya kartêkirina daneyan û cihekî kombûnê ji bo hejmarek şervanên rejima dagirker li deverên dagirkirî, bi êrîşên droneyan bûn armanca Artêşa Komara Îslamî ya Îranê."

Hat diyarkirin ku êrîş dê berdewam bin û "Ji bo sûcên ku li dijî welatiyên me kirin, ewê ji dijminan tol bê sitandin."

- Artêşa Pasdarên Îranê: Me baregehên DYAyê yên li Mîrektiyan, Behreyn û Kuweytê kirin armanc

Fermandarê Hêza Deryayî ya Artêşa Pasdarên Îranê Deryadar Elî Riza Tengisîrî ragihand ku baregehên DYAyê yên li Mîrektiyên Yekbûyî yên Erebî, Behreyn û Kuweytê kirin armanc.

Tengisîrî li ser hesabê xwe yê Xê ya medyaya civakî ya Amerîkayê daxuyanî da.

Di daxuyaniyê da wiha hat gotin:

"Hêzên me yên Deryayî, baregehên DYAyê û xalên kilît ên li Defra, Şêx Îsa û Udaîriyê kirin armanc."

Fermandarê Îranî ragihand ku di êrîşê da radar, bircên kontrolê, xangarên balafiran û depoyên sotemeniyê yên li baregehan şewitîne.