Li Şûnwarê Qedîm Heranê ya ji cih û warên herî kevn ên cihanê ye û di Lîsteya Berwext a Kelepora Cîhanî ya UNESCOyê da ye, qalibê nan ê dîrokî yê bi neqşê dîlima peqleweyê hat derxistin.

Prof. Dr. Mehmet Onalê Serokê Beşa Arkeolojiyê ya Zanîngeha Heranê û Vekolanên Şûnwarên Heranê ji peyamnêrê AAyê ra diyar kir ku bi fînansmana Wezareta Çand û Turîzmê û her wiha bi piştevaniya Walîtî û Şaredariya Bajarê Mezin a Şanliurfayê di çarçoveya "Projeya Mîrata Seba Siberojê" da xebatên vedanê yên arkeolojîk ên li şûnwarên qedîm berdewam in.

Onal bal kişand ku di dîroka dinyayê da Heran wekî navendeke cîwarbûn û zanistê derdikeve pêş û da bibîrxistin ku qedera 800 sal berê bajar di dema dagiriya Moxolan da hatiye talankirin û wêrankirin.

Onal destnîşan kir ku di nav berateyên li bakurê Mizgefta Mezin a Heranê da ew rastî gelek berheman hatin ku dîrokê ronî dikin.

Onal diyar kir ku di vekolanên Medreseya Heranê da wan, qalibê nan dît û wiha dewam kir, "Gelekî giring e ku berateya bi qasî 40 santîmetreyî bi ber, bi awayekî saxlem hat bidestxistin."

Onal got, berhema dîrokî ya neqişandî, îmze û têgihîştina hunerî ya çêkerê xwe vedihewîne û wiha dewam kir, "Me tesbît kir, ev berhema ku ji heriya sorkirî hatiye çêkirin û her wekî bi dilîmên peqleweyê hatiye neqişandin, wekî qalibê nan hatiye emilandin. Divê qalibekî nan be ku 800 sal berî niha hatiye çêkirin."