Li Şanliurfayê di encama xebatên vekolanê da ku di çarçoveya "Projeya Girên Kevir" a Wezareta Çand û Turîzmê birêva dibe da, bermayiyên "Girê Mendik"ê ku tê texmînkirin ji Girê Miraza kevintir e hatin tespîtkirin.

Girê Mendikê ji aliyê Seroka Vekolanê ya Girê Çakmak Fatma Şahînê va li Taxa Payamliya li çoltera navçeya Eyûbiyeyê hatin kifşkirin.

Xebatên kolandinê yên ku bi serokatiya Endamê Hîndekariyê yê Beşa Arkeolojiyê ya Zanîngeha Liverpoolê Prof. Dr. Douglas Baird, bi tevkariya Muzeya Arkeolojiyê ya Şanliurfayê û Enstîtuya Arkeolojiyê ya Îngilîz di sala 2024an da hatin destpêkirin, berdewam dikin.

Prof. Dr. Douglas Baird ji nûçegihanê AAyê ragihand ku li qadê bermayiyên ku mezinahiya wan ji hevdu cuda ne keşif kirine û ji bo tespîtkirina erk û fonksiyonên wan xebatan didomînin.

Baird got ku ew wisa texmîn dikin ku Girê Mendikê ji Serdema Neolîtîk maye û wiha dewam kir:

"Ev der jî di nav projeya girên kevir ên wekî Girê Miraza û Girê Karahanê da ye, lê îhtimal heye ku ji wan giran kevintir be. Em wisa texmîn dikin ku ev gir ji destpêka Serdema Neolîtîk maye. Ev xebatên vekolanê him ji bo pêşvebirina Projeya Girên Kevir him jî ji bo tespîtkirin û nirxandina destpêka serdema neolîtîk girîng in."