Beriya zivistanê li Qersê dirûna (çinîna) lazûtê silajê yê ku ji bo dabînkirina xwarina ajalan hatibû çandin, didome.

Li Qersa ku yek ji navendên girîng yên çandinî û heywandariyê ye, cotkarên dewaran ji bo dabînkirina xwarinê, berê xwe didin hilberîna lazûtê (gelaşê) silajê. Bi taybetî li navçeya Akyaka û gundên wê yên xwedî zeviyên berhemdar, xebatên dirûna lazûtê silajê bi lez û bez didome.

Cotkar lazûtê ku havînê çandine, bi traktoran dirûnin (diçinin). Piştî dirûnê, lazût tê parçekirin û di çalên silajê da ji bo fermantasyonê tê hiştin.

Berhema silajê ya îsal ku di zivistanê da weke çavkaniya sereke ya xwarina heywanan tê bikaranîn, zêde ye û ev yek jî cotkaran kêfxweş kir.

Mustafa Şimşekê cotkar ji nûçegihanê AAyê ra got ku îsal wan demsalek gelek berhemdar derbas kiriye.

Şimşek diyar kir ku xebat bi lez û bez didome û wiha got, "Ji dekarê me 10 ton berhem girt, me 20 dekar çand, me avdanî, zibilkirin û lênêrîna wê kir. Niha em dirûnin û depoyê dikin. Em xwê an jî kayê dirijînin ser silajê û bi traktoran pê dixin (datînin). Em bi naylonê datînin da ku xera nebe."