Di navbera AŞya Veguhestina Petrolê bi Xetên Boriyê va û ji komên pêşhatî yên vejenê yên dinyayê Mercuria û Woodside Energyê da peymanên demdirêj ên dabînkirina xaza siruştî ya rohnkirî (LNG) hatin îmzekirin.

Li gorî daxuyaniya Wezareta Vejen û Çavkaniyên Siruştî, di çarçoveya Lijneya Giştî ya Neteweyên Yekbûyî da Serokomar Recep Tayyip Erdogan li New Yorkê hevdîtinên xwe didomîne û di demeke wiha da di warê vejenê da peymanên dîrokî hatin îmzekirin.

Peymana dabînkirina LNGyê ya di navbera Mercuria û her wiha BOTAŞê da, ku saziya dewletê ya Tirkiyeyê ya ji binesaziya petrol û xazê û bazirganiya xazê berpirsiyar e, ji hêla Abdulvahit Fidanê Midûrê Giştî yê BOTAŞê û Daniel Jaeggiyê Serokê Mercuriayê li Turkeviya li New Yorkê hat îmzekirin.

Di daxuyaniyê da cih dan nêrînên Wezîrê Vejen û Çavkaniyên Siruştî Alparslan Bayraktar jî ku wiha got, "Îro di navbera BOTAŞ û Mercuriayê da ji bo 20 salan peymana dabînkirina LNGya jêder Amerîka hat îmzekirin ku beramberî qedera 70 milyar mêtrokûpî xaza siruştî ye."