Ali İhsan Çam
09 Март 2022•Ажурирај: 10 Март 2022
АНКАРА (АА) - Израелскиот претседател Исак Херцог порача дека Израел и Турција можат и треба да соработуваат, што, како што истакна ќе има значајно влијание врз целиот регион, јавува Агенција Анадолија (АА).
Херцог денеска пристигна во дводневна официјална посета на Анкара, главниот град на Турција, а на првиот ден се состана со турскиот претседател Реџеп Таип Ердоган.
Во своето обраќање пред новинарите по состанокот на двајцата лидери, Херцог го нагласи значењето на соработката помеѓу Израел и Турција.
„Нашата цел е да ги поставиме темелите за развој на пријателски односи меѓу нашите држави и народи“, рече израелскиот претседател, и додаде:
„Израел и Турција можат и треба да соработуваат, што значително би влијаело на овој регион кој сите го нарекуваме дом.“
Херцог, исто така, најави дека министерот за надворешни работи на Турција Мевлут Чавушоглу следниот месец ќе го посети Израел.
Израелскиот претседател пристигна денес во Турција и ја започна дводневната официјална посета во Анкара. Со тоа тој стана првиот израелски претседател кој официјално ја посетил Турција од 2008 година.
За вечерва е најавено дека во Претседателската палата во Анкара ќе се одржи свечена вечера, по што израелскиот претседател ќе отпатува за Истанбул каде ќе се сретне со претставници на еврејската заедница во градот на Босфорот.
Билатералните односи меѓу Турција и Израел беа нарушени во декември 2017 година со одлуката на поранешниот израелски премиер Бенјамин Нетанјаху и поранешниот американски претседател Доналд Трамп да го прогласат Ерусалим (Кудс) за главен град на Израел.
САД потоа ја преместија својата Амбасада од Тел Авив во Ерусалим, а израелските сили во интервенцијата на протестите убија најмалку 60 Палестинци.
Турција и Израел по овие настани и немири на границата со Газа ги повлекоа амбасадорите и ги редуцираа дипломатските односи на ниво на вршители на работите.
Во Израел на 23 март минатата година се одржаа предвремени парламентарни избори, а на 13 јуни 2021 година беше формирана коалициска Влада на премиерот Нафтали Бенет. Така заврши 12-годишниот мандат на поранешниот израелски премиер Нетанјаху.
Турскиот претседател Ердоган во јули минатата година започна разговори со новиот израелски претседател Херцог и ги направи првите чекори кон нормализација на билатералните односи.
