Zeynep Duyar, Mert Davut
04 Ноември 2026•Ажурирано: 04 Ноември 2026
Турција планира да ја претстави „Инвестициската платформа за индустриска декарбонизација на Турција“ (ТИДИП) на претстојната 31. конференција на Обединетите нации за климатски промени (КОП31), што ќе се одржи во југозападната област Анталија, јавува Анадолу.
Анталија ќе биде домаќин на КОП31 од 9 до 20 ноември, при што главниот фокус ќе биде ставен на воспоставување партнерства за поддршка на новата платформа.
Оваа нова иницијатива е создадена преку заедничка активност на турското Министерство за индустрија и технологија, Европската банка за обнова и развој (ЕБОР), Меѓународната банка за обнова и развој (ИБРД) и Меѓународната финансиска корпорација (ИФЦ).
Инвестициската платформа е насочена кон сектори кои имаат високи емисии на јаглерод диоксид, како што се производството на железо и челик, алуминиум, цемент и вештачки ѓубрива. Планот предвидува мобилизирање на над 6 милијарди долари до 2030 година, со цел да се постигне годишно намалување на емисиите еквивалент на јаглерод диоксид за 20 милиони тони.
Фондот за чисти технологии, во рамките на Климатските инвестициски фондови, веќе обезбеди почетни средства во износ од 250 милиони долари за започнување на иницијативата. Се очекува и други финансиски институции да се приклучат кон заедничката декларација со која ќе биде претставена оваа шема на КОП31.
Инвестициите за декарбонизација ќе бидат групирани во неколку клучни области: зелен водород, зафаќање и складирање јаглерод, енергетска ефикасност, електрична енергија од обновливи извори и климатски технологии.
Турскиот министер за индустрија и технологија, Мехмет Фатих Каџир, изјави дека новата иницијатива има цел да ја зајакне соработката меѓу Анкара и Европската Унија (ЕУ) во процесот на „зелена транзиција“.
„Веруваме дека поддршката од ЕУ за платформата, во износ од 5,7 милијарди евра во рамките на програмата ИПА III (Инструмент за претпристапна помош за периодот 2021–2027 година), значително ќе ја зајакне платформата и ќе овозможи мобилизирање на дополнителни средства за инвестиции во декарбонизација. Нашата цел е да ги надградиме темелите што веќе ги поставивме меѓу Турција и ЕУ во текот на изминатите 20 години, како и да го продлабочиме нашето партнерство преку технологии од следната генерација и стратегиски инвестиции“, рече тој.