Турција изрази сочувство по земјотресот во Колумбија 


Министерството за надворешни работи на Турција изрази сочувство по земјотресот што вчера ја погоди Колумбија, при што загинаа најмалку 111 лица, јавува Анадолу.

„Изразуваме сочувство до семејствата на загинатите во земјотресот и до народот на Колумбија, а на повредените им посакуваме брзо закрепнување“, соопшти Министерството.

Од Министерството наведоа дека Амбасадата на Турција во Богота е во контакт со турските граѓани во земјата и внимателно ја следи нивната состојба.

„Длабоко сме погодени од загубата на човечки животи и материјалната штета предизвикани од земјотресот што денес ја погоди Колумбија“, се наведува во соопштението.

Најмалку 111 лица загинаа кога силен земјотрес со јачина од 7,4 степени вчера го погоди западниот дел на Колумбија, при што се урнаа објекти и беа активирани големи спасувачки операции во повеќе градови.

„Најмалку 87 лица се повредени“, изјави за новинарите претседателот Абелардо де ла Есприела.

Тој соопшти дека земјотресот оштетил 1.575 домови, од кои 37 се целосно уништени, како и 61 објект, 18 здравствени центри, 52 образовни центри, 17 центри во заедницата и 18 патишта.

Колумбиската Влада прогласи состојба на национална катастрофа со цел зајакнување на мобилизацијата и координацијата на институционалните капацитети за справување со вонредната состојба.

Земјотресот се случил во 7:34 часот по локално време (12:34 часот по Гринич), со епицентар на околу пет километри источно од градот Сан Хозе дел Палмар, според податоците на Американскиот геолошки институт. Земјотресот настанал на длабочина од 107 километри.

Последователен земјотрес со јачина од 5,0 степени бил регистриран во 8:18 часот (13:18 часот по Гринич), на околу 16 километри западно од Сан Хозе дел Палмар. Општината, која се наоѓа во департманот Чоко, има околу 4.800 жители и се наоѓа на надморска височина од 1.288 метри.

И покрај значителната јачина на земјотресот, Американскиот центар за предупредување од цунами соопшти дека не се очекува цунами во американските сојузни држави Калифорнија, Орегон, Вашингтон или Алјаска, ниту во канадската провинција Британска Колумбија.

Колумбиските власти соопштија дека нема опасност од цунами покрај колумбискиот брег на Пацификот.