Diyar Güldoğan
06 Јули 2023•Ажурирај: 07 Јули 2023
АНКАРА (АА) - Туркије работи на тоа да обезбеди продолжување на минатогодишниот историски договор за извоз на жито преку Црното Море, кој моментално истекува за 11 дена, соопшти денес Министерството за национална одбрана на земјата, јавува Анадолу.
„Нашите контакти со официјалните претставници од Обединетите нации (ОН), Русија и Украина во врска со продолжувањето на иницијативата за жито, која треба да истече на 17 јули, продолжуваат во координација со турското Министерство за надворешни работи“, изјави претставник на Министерството за национална одбрана за новинарите во главниот град Анкара.
Официјалниот претставник додаде дека според договорот, до денес повеќе од 32 милиони тони жито се транспортирани до луѓето кои имаат потреба.
„Нашата земја ќе продолжи да го врши својот дел со продолжување на конструктивните иницијативи за регионален мир и хуманитарна помош, особено за повторно продолжување на договорот за жито“, рече претставникот, осврнувајќи се на неколкуте претходни продолжувања на договорот под силна иницијатива на Анкара.
Пред една година, Туркије, ОН, Русија и Украина потпишаа договор во Истанбул за продолжување на извозот на жито од три украински пристаништа на Црното Море, што беше паузиран по почетокот на руско-украинската војна во февруари. Во Истанбул беше формиран Заеднички координативен центар со официјални претставници од трите земји и ОН за надгледување на испораките.
Првиот брод што превезуваше жито во рамките на договорот тргна во август минатата година од украинското пристаниште Одеса.
Туркије, меѓународно пофалена за нејзината единствена улога на посредник меѓу Украина и Русија, постојано ги повикуваше Киев и Москва да ја прекинат војната преку преговори.
Руските власти силно навестија дека овој месец би можеле да го блокираат продолжувањето на договорот за жито, жалејќи се дека делови од договорот за дозволување на рускиот извоз останале неисполнети.
- Борба против тероризмот -
Осврнувајќи се на напорите на Туркије за борба против тероризмот, официјалниот претставник исто така рече дека Туркије од 1 јануари спровела 320 операции и неутрализирала вкупно 794 терористи.
„Нашата армија се бори со голема посветеност да придонесе за мирот и безбедноста на нашата земја и мирот и стабилноста на нашиот регион, светот и целото човештво против сите терористички организации“, изјави претставникот, осврнувајќи се на ЈПГ/ПКК, ДЕАШ и ФЕТО.
Сите операции на Туркије против терористичката закана се спроведуваат во согласност со меѓународното право, со почитување на границите и територијалниот интегритет на сите нејзини соседи, особено на Ирак, во рамките на правото на самоодбрана и насочени само кон терористичките елементи во регионот, истакна официјалниот претставник, осврнувајќи се на операциите насочени кон засолништата на терористите преку границата.
Во својата речиси 40-годишна терористичка кампања против Туркије, ПКК, која е ставена на листата на терористички организации од страна на Туркије, САД, Велика Британија и ЕУ, е одговорна за смртта на најмалку 40.000 луѓе, меѓу кои и жени, деца и доенчиња.
Во неуспешниот обид за државен удар во Туркије во 2016 година, организиран од терористичката организација ФЕТО и нејзиниот водач Фетула Ѓулен, кој живее во САД, загинаа 251 лице, додека 2.734 беа повредени.
