Либија: Поморскиот договор со Турција не е насочен против ниедна земја

Вршителот на должноста министер за надворешни работи на Либија, Тахер ал-Баур, изјави дека поморскиот договор на неговата земја со Турција не е насочен против ниедна друга држава, нагласувајќи дека двете земји имаат суверено право да склучуваат такви договори, јавува Анадолу.

Во интервјуто за телевизијата Ал Џезира, емитувано вчера, Ал-Баур рече дека договорот, потпишан во 2019 година од тогашната либиска Влада на национален договор, неодамна бил ратификуван од Претставничкиот дом на земјата.

„Овој договор секако не е насочен против ниедна земја“, рече тој, додавајќи дека станува збор за договор за поморска соработка меѓу двете држави.

„Либија и Турција се суверени држави и имаат право да склучуваат какви било договори“, истакна тој.

Ал-Баур нагласи дека Либија нема намера да создава тензии во регионот и дека ја разбира загриженоста на земјите што се спротивставија на договорот.

„Ја почитуваме загриженоста на земјите што го отфрлија овој договор, но вратата секако е отворена за дијалог и разговори со сите, со цел да се постигне најдобро можно решение“, рече тој.

Министерот изјави дека Либија сака регионот да стане центар на стабилност, раст и развој наместо извор на тензии.

Тој ја потврди подготвеноста на Триполи за дијалог и за разгледување на прашањата што другите земји ги поставуваат во врска со договорот.

Претставничкиот дом на Либија, со седиште во источниот дел на земјата, едногласно го одобри договорот за разграничување на поморските области на 20 октомври, со што го смени претходниот став против договорот и ги укина резолуциите усвоени во 2020 година, со кои беа отфрлени договорите со Турција и беше побарано прекинување на политичките врски со Анкара.

Во ноември 2019 година Турција и Либија го потпишаа договорот за разграничување на поморските јурисдикции, со цел утврдување на границите на нивните поморски области во Средоземното Море.

Анкара ја поздрави одлуката на либискиот Парламент, наведувајќи дека меморандумот ги штити заедничките права и интереси на двете земји, во согласност со меѓународното право и принципите на правичност.

Сепак, Грција, Египет и кипарската грчка администрација ја отфрлија ратификацијата на договорот.