Граѓаните со ерменско потекло од Хатај сакаат поголема помош да се достави во повеќе сиромашни места

ХАТАЈ (АА)

- Тахир Туран ЕРОГЛУ / Ибрахим АКТАШ

Местото Вакифли, кое се наоѓа во подрачјето на градот Самандаг во турската област Хатај и во кое живеат турски државјани со ерменско потекло, е едно од многуте места кои ги потресоа земјотресите со епицентар во Кахраманмараш. Населението на Вакифли бара повеќе помош „да се достави до местата на кои таа им е повеќе потребна“, пишува Анадолу.

Местото Вакифли, рурална населба со 130 жители, составена од 35 домаќинства, се наоѓа на 3 километри од обласниот центар. Иако нема урнати згради и човечки жртви во ова место, околу 30 луѓе, уплашени од разорните земјотреси, заминаа во Истанбул. Оние кои останаа, почнаа да се засолнуваат во шатори и во затворените простори на чајџилниците.

Берч Картун, претставник на локалната власт на Вакифли, за Анадолу (AA) изјави дека разорните земјотреси со епицентар во Кахраманмараш предизвикале голем страв, а поради последователните потреси, сѐ уште не влегле во своите домови.

Информирајќи дека земјотресите не предизвикале уништување во Вакифли, но дека некои згради се оштетени, Картун рече дека поради нивниот страв, 45 лица, од кои 30 од нивното соседство и 15 од Искендерун, со автобус што го испратила Патријаршијата, заминале за Истанбул.

Осврнувајќи се на помошта дадена во неговата населба по земјотресот, Картун рече:

„Од првиот ден пристига помош во нашето соседство. Најпрвин би сакал да им се заблагодарам на нашите добротвори. Навистина, не очекував толку многу. Браво, имаме многу луѓе што прават добри дела во Туркије. Господ нека ја благослови и нашата држава, прави сѐ за да ги задоволи нашите потреби. Прашуваат да не недостига нешто. Добро ни е, ништо не ни недостига. Задоволни сме од услугите. Се јавуваа од секаде, од општините, од Црвената полумесечина да ни помогнат. Рековме: ’Дајте им на оние кои имаат потреба, ние добивме доволно. Нема потреба од складирање. Доколку имаме потреба, ќе ве известиме’ и сите ги вративме назад. Всушност, нема потреба од правење резерви, би било подобро помошта да дојде до оние на кои таа повеќе им е потребна. Ние во моментов имаме залихи кои се доволни за околу еден месец.”

- Затворениот простор на чајџилницата стана нивен привремен дом

Берч Картун на Хатај - „градот на цивилизациите“, каде што луѓето од сите националности живеат во братство, му посака што поскоро да се врати на старите денови.

Објаснувајќи дека престојуваат во затворениот простор на чајџилница, Картун рече: „Таму ги собравме сите наши пријатели. Тие не јадат ниту пијат дома. Овде организиравме сопствена кујна, самите подготвуваме појадок, ручек и вечераме со залихите од донациите.“

Оханес Кескин, еден од жителите на Вакифли, заблагодарувајќи се на добротворите кои испратија помош во Вакифли, го употреби изразот „неверојатно“.