Третиот самит „GO! GLOBAL Türkiye“ започна вчера во Истанбул, обединувајќи глобални инвеститори, технолошки лидери, турски претприемачи и експерти за вештачка интелигенција на тридневни разговори за меѓународната експанзија, инвестициите и иновациите, јавува Анадолу.
Самитот, кој трае до утре, е организиран од Одборот за надворешни економски односи на Турција (ДЕИК), преку неговата Дигитална работна група при Турско-американскиот деловен совет (ТАИК), во соработка со „Ендевор Туркије“.
Според податоците на ДЕИК, инвестициските компании што учествуваат на настанот располагаат со капитал од над 800 милијарди долари, што е повеќе во однос на претходно најавените 500 милијарди долари.
Се очекува учество на повеќе од 50 инвестициски компании, 250 основачи на стартап компании и 900 присутни.
Главниот настан ќе се одржи денес во „Диван Куручешме“ во Истанбул, а на него ќе присуствуваат министерот за трговија Омер Болат, министерот за индустрија и технологија Мехмет Фатих Каџир, претседателот на ДЕИК Наиил Олпак, претседателот на ТАИК Мурат Озјегин, како и други лидери од деловниот и технолошкиот сектор.
Програмата опфаќа повеќе од 200 однапред договорени индивидуални средби помеѓу претприемачи и инвеститори, кои се споени врз основа на индустријата, инвестициските приоритети, фазата на развој на компанијата и целите за меѓународна експанзија.
Компании основани во Турција, како што се „Трендјол“, „Пик гејмс“, „Дрим гејмс“ и „Инсајдер Ван“, го достигнаа статусот на „еднорози“ (компании со вредност над една милијарда долари), додека компаниите за вештачка интелигенција, меѓу кои „fal.ai“ и „HubX“, го демонстрираат глобалниот досег на турските технолошки таленти.
Главниот финансиски директор на „Убер“, Балаџи Кришнамурти, ќе говори за глобалната експанзија на компанијата во рамките на сесија што ќе ја модерира Ханде Џилингир, коосновач и извршен директор на „Инсајдер Ван“.
Меѓу останатите учесници се и раководни лица од инвестициските фондови „Џенерал Атлантик“, „Ровервуд Капитал“, „Апис Партнерс“ и „Вамда Капитал“, како и претставници од „Спидинвест“, „Хасл Фанд“, „Квест Венчурс“ и „МЕВП“.
Третиот ден од самитот ќе вклучи главно обраќање на турскиот министер за трезор и финансии Мехмет Шимшек, разговори меѓу инвеститорите, како и сесии посветени на пристапите на меѓународните инвеститори (т.н. „лимитирани партнери“) кон пазарите во развој и соработката помеѓу инвеститорите и фирмите за ризичен капитал.
Претседателот на ДЕИК, Наиил Олпак, изјави дека технолошките таленти, претприемачкиот екосистем и меѓународно успешните компании во Турција нудат значителни можности за економски раст. „Замавот што го постигнавме во секторите на игри, финансиски технологии и вештачка интелигенција го покажува потенцијалот на нашата земја за производство и извоз со висока додадена вредност.
За да го претвориме овој потенцијал во трајна економска вредност, мораме да им овозможиме на нашите претприемачи подобар пристап до финансирање, меѓународни инвестициски мрежи и нови пазари“, рече тој.
Озјегин изјави дека целта на самитот е директно да ги поврзе турските стартапи со меѓународни инвеститори и да ја зајакне позицијата на земјата во глобалниот иновациски екосистем.
„Возбудени сме што ќе собереме на едно место инвестициски компании, во чии сегашни или поранешни портфолија се наоѓаат глобални компании како Ербиенби, Спотифај, СпејсИкс, Палантир технолоџис, Епик Гејмс, Антропик и Датабрикс, заедно со лидери и експерти од повеќе од 10 глобални технолошки компании, меѓу кои ОпенАИ, Гугл ДипМајнд, Епл, Сејлсфорс и ИБМ“, рече тој.
Џилингир истакна дека моделот за поврзување на самитот е осмислен така што целите на претприемачите ќе се усогласат со приоритетите на инвеститорите уште пред почетокот на средбите, што ќе помогне во забрзување на партнерствата и глобалниот раст.
Претседателот на „Ендевор Туркије“, Емре Курттепели, истакна дека вештачката интелигенција ги преобликува инвестициските приоритети и создава нови можности за турските претприемачи.
„Турските претприемачи поседуваат талент и иновативни идеи за да одиграат значајна улога во оваа трансформација. За да се претвори овој потенцијал во раст на глобално ниво, потребно е рано и директно вклучување со инвеститори кои ги дефинираат трендовите за инвестирање во вештачка интелигенција, како и со компании кои веќе успешно се развиле и прошириле во оваа област“, рече Курттепели.
Дополнителни информации за самитот се достапни на goglobalturkiye.com.
