Турција го поздрави привремениот прекин на огнот меѓу САД и Иран

Турција денес ја поздрави одлуката за привремен прекин на огнот меѓу Соединетите Американски Држави (САД) и Иран, нагласувајќи ја важноста за негово целосно почитување, јавува Анадолу.

„Нагласуваме дека привремениот прекин на огнот мора целосно да се спроведе на терен и се надеваме дека сите страни ќе се придржуваат до постигнатиот договор“, се наведува во соопштението на Министерството за надворешни работи на Турција.

Се нагласува дека патот до траен мир може да се постигне само преку дијалог, дипломатија и меѓусебна доверба и се наведува:

„Ќе продолжиме да ја даваме целата неопходна поддршка за да се обезбеди успех на преговорите што ќе се одржат во Исламабад.“

Турција, исто така, му честиташе на Пакистан за неговата улога во овој процес и изрази желба за продолжување на сите иницијативи што придонесуваат за глобалниот мир.

Американскиот претседател Доналд Трамп синоќа објави дека се согласил „да ги прекине бомбардирањата и нападите врз Иран во период од две недели“.

Регионалните тензии ескалираа откако САД и Израел започнаа заедничка офанзива врз Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.