Шпанија ја започна изборната кампања пред гласањето на 29 ноември

Шпанија денес ја започна кампањата за парламентарните избори, при што премиерот Педро Санчез ги повика гласачите да ги одбранат социјалните придобивки остварени за време на неговата влада, додека конзервативните и екстремно десничарските ривали се обидуваат да обезбедат мнозинство во Парламентот, јавува Анадолу.

Кампањата започна на полноќ, пред гласањето закажано за 29 ноември, а главни теми во изборната трка се високите трошоци за домување, миграцијата, обвинувањата за корупција и безбедноста на железничкиот сообраќај.

Санчез ги распиша предвремените избори откако Парламентот во октомври ги отфрли декретите на неговата влада за домувањето.

Анкетата на агенцијата „40дБ“, спроведена за весникот „Ел Паис“ и радиодифузерот „Кадена СЕР“ на почетокот на кампањата, предвидува вкупно 190 пратенички места за конзервативната Народна партија (ПП) и екстремно десничарската партија „Вокс“ – повеќе од 176-те места потребни за мнозинство во Долниот дом, кој има 350 пратеници.

Според анкетата, ПП би освоила 31,5 проценти од гласовите, а „Вокс“ околу 19 проценти. Тоа укажува дека крајната десница би можела речиси да го удвои бројот на пратеници во споредба со 2023 година, делумно привлекувајќи гласачи од својот конзервативен ривал.

- Миграцијата и корупцијата во фокусот на пораките на десницата -

Лидерот на шпанската Народна партија (ПП), Алберто Нуњес Феихо, ја почна кампањата во Бадалона, во близина на Барселона, со ветување за влада што ќе ги заштити границите и ќе бара од мигрантите да се интегрираат во општеството.

Тој вети и компетентно управување и влада што „не краде“, повикувајќи се на судските истраги поврзани со социјалистите и најблиското опкружување на Санчез.

Лидерот на „Вокс“, Сантијаго Абаскал, ја започна кампањата во Уеска, ставајќи ги во центарот на своите пораки построгите контроли на миграцијата и повластениот третман за шпанските државјани.

Неговата партија предлага милитаризација на границата во Сеута, давање предност на Шпанците при доделувањето станбено сместување и забрана за изнајмување недвижности на имигранти без регулиран правен статус.

Абаскал, исто така, ја обвини миграцијата за зголемениот притисок врз здравствените услуги, тврдејќи дека Шпанците не добиваат навремено лекување. Тој ги претстави изборите како можност за „длабока промена“, опишувајќи ја Владата како „криминална, лажлива и корумпирана мафија“.

Двете партии се залагаат за проширување на станбената изградба, додека Феихо вети дека ќе ги укине мерките за заштита на станарите усвоени вчера.

- Санчез повика на изборен пресврт -

Санчез ја започна кампањата во Севиља, повикувајќи на „епски пресврт“ преку масовна мобилизација на прогресивните гласачи.

Тој ги претстави изборите како избор меѓу натамошен општествен напредок и уназадување на правата, бранејќи ги резултатите на својата влада во однос на пензиите, минималната плата и родителското отсуство.

„Против оние што сакаат да кратат, кратат и кратат, ние ќе гласаме, гласаме и гласаме“, рече тој.

Санчез го поздрави и вчерашното парламентарно усвојување на мерките за заштита на станарите, меѓу кои и гаранциите против иселување и продолжување на договорите за закуп. Посебниот предлог за неограничено продолжување на договорите за закуп беше отфрлен.

Домувањето стана главна грижа на јавноста во Шпанија, при што речиси 56 проценти од испитаниците во октомвриската анкета на Центарот за социолошки истражувања (ЦИС) го посочиле како еден од трите најголеми проблеми во земјата.

- Левицата бара посилна заштита на станарите

Поранешната градоначалничка на Барселона, Ада Колау, кандидатка на левичарската коалиција „Френте Амплио“, ја започна кампањата во работничката населба Ваљекас во Мадрид.

Таа повика на транспарентна и чесна влада и го повика Санчез да покаже „повеќе скромност кон работничката класа и повеќе храброст кон шпекулантите“.

Бидејќи и партијата „Подемос“ настапува самостојно, партиите лево од социјалистите се соочуваат со предизвикот да ги мобилизираат гласачите, истовремено натпреварувајќи се меѓу себе.

Доколку ниту еден од двата блока не освои мнозинство, каталонските, баскиските и другите регионални партии повторно би можеле да имаат пресудна улога во одлучувањето кој ќе ја формира владата.