Француските пожарникари започнаа голем штрајк поради недостиг на кадар и ресурси

Француските пожарникари денес започнаа голем штрајк поради недостиг на персонал и опрема, барајќи зголемено финансирање и дополнителни вработувања, објави телевизијата БФМТВ, пренесува Анадолу.

Претставници на девет синдикати на пожарникари и специјализиран персонал одржаа прес-конференција пред Министерството за внатрешни работи, порачувајќи дека ресурсите заостануваат зад потребите и барајќи масовни вработувања.

Ксавиер Боа, портпарол на меѓусиндикалната група, најави „интензивна мобилизација, сигурно најголема по обем што професијата пожарникар некогаш ја видела“ и повика на протест во Париз на 29 септември.

Во соопштението објавено на 7 август со кое го најавија штрајкот, деветте синдикати наведоа „големи тешкотии“, вклучително и „хроничен недостиг на персонал“ и „очигледен недостиг на материјални ресурси“.

Тие побараа одржливо и праведно финансирање, масовно вработување професионални пожарникари, како и административен, технички и специјализиран персонал, како и здравјето и безбедноста на вработените да станат вистински национален приоритет.

Штрајкот се одржува во услови на тешка сезона на шумски пожари во Франција.

Министерот за внатрешни работи Лоран Нунез на 26 јули изјави дека од почетокот на 2026 година во шумски пожари изгореле 115.000 хектари, вклучително и 42.000 хектари во југозападниот департман Жиронд.