Украина: Три лица загинаа, 11 се повредени во руски воздушни напади

Три лица загинаа, а 11 се повредени во руските напади врз регионот на Киев и Харков во Украина, соопшти денес Државната служба за вонредни состојби на Украина, пренесува Анадолу.

Според Службата, во регионот Киев, руските сили извршиле напад врз објект за производство и складирање во Обухивската Област, при што загинале три лица, а шестмина се повредени.

Од Службата наведоа дека нападот предизвикал пожар, кој подоцна бил изгаснат, додека спасувачките екипи продолжиле со расчистување на урнатините.

Во североисточниот регион Харков, пет лица се повредени во напад со беспилотни летала врз градот Изјум, додадоа од Службата.

Од друга страна, руското Министерство за одбрана соопшти дека неговите сили извршиле напади врз украинската логистичка и пристанишна инфраструктура, како и врз товарни бродови што се користеле за транспорт на воени материјали и стоки со двојна намена за Украинските вооружени сили.

Од Министерството наведоа дека биле погодени логистички центар во Хмелницки, транспортно-логистички центар во Ковел во Волинската Област, како и три товарни брода кои истоварале залихи во пристаништето Рени, во регионот на Одеса.

Исто така, се тврди дека руските сили погодиле товарен брод што превезувал воени материјали за Украина, додека пловел кон пристаништето во Одеса.

Понатаму, Министерството соопшти дека руската противвоздушна одбрана во текот на ноќта пресретнала и уништила 136 украински беспилотни летала над 15 руски региони.