Три лица загинаа во пожар во станбена зграда во Германија

Три лица загинаа, а пет беа повредени рано утринава во пожар во станбена зграда во Бохум, град во западна Германија, во индустрискиот регион Рур, јавува Анадолу.

Портпаролот на противпожарната служба во Бохум за јавниот радиодифузен сервис ВДР изјави дека пожарникарите добиле дојава за пожарот околу 4:15 часот наутро (2:15 часот по Гринич).

Кога пристигнале на местото, огнот веќе бил широко распространет.

Тој рече дека екипите не можеле да стигнат до горните катови преку скалиштето на зградата бидејќи било блокирано од огнот и чадот.

Двајца станари биле спасени со помош на специјално противпожарно возило со скала, уште двајца со преносни скали, а едно лице скокнало врз воздушно перниче за спасување.

За време на последователните активности за гаснење на пожарот, екипите пронашле три тела во стан на вториот кат.

Полицијата соопшти дека причината за пожарот сè уште се истражува, вклучително и прашањето дали во станот имало детектор за чад.