Руското разузнавање тврди дека сојузниците на НАТО не пронашле руска врска со заговорот со дронови во Лајпциг

Руската Служба за надворешно разузнавање (СВР) денес соопшти дека разузнавачките служби на земјите од НАТО не нашле докази за вмешаност на Москва во обидот за напад со дрон на германскиот аеродром Лајпциг/Хале во август, пренесува Анадолу.

Во соопштението преку Телеграм, СВР тврди дека западните разузнавачки служби во тајност дошле до заклучоци што се во спротивност со јавните обвинувања на Германија против Русија.

„Многумина на Западот само се преправаат дека му веруваат на германското раководство“, соопшти агенцијата. „Јавно, сојузниците изразуваат 'целосна солидарност‘ со Берлин, кој наводно станал 'жртва на руска провокација‘. Сепак, 'зад сцената‘, ситуацијата изгледа сосема поинаку.“

СВР наведе дека разузнавачките служби на НАТО, по испитувањето на околностите на инцидентот, ги информирале своите влади дека нема „ниту најмал доказ за вмешаност на Русија“.

„Напротив, укажано е на многубројни знаци за 'украинска трага‘. На владините служби им беше препорачано да се воздржат од категорични, а особено од јавни изјави за вината на Москва“, се наведува во соопштението.

Германија ја обвини Русија за инцидентот од 4 август, кога во близина на украински товарен авион на аеродромот Лајпциг/Хале беше пронајден дрон со експлозив. Дронот не експлодираше и беше безбедно деактивиран.

Германскиот министер за внатрешни работи Александар Добринт претходно овој месец изјави дека нападот следувал по она што тој го опиша како „добро воспоставен модел на руски хибридни операции во Европа“.

СВР го обвини Берлин дека ја обвинува Москва за да ги оправда зголемените издвојувања за одбраната во буџетот за 2027 година.

Агенцијата, исто така, го поврза спорот со германската внатрешна политика, укажувајќи на изборите во Саксонија-Анхалт на 6 септември и на претстојните избори во Мекленбург-Западна Померанија и во Берлин.

Рускиот претседател Владимир Путин, исто така, ги отфрли обвинувањата на Германија, обвинувајќи го Берлин дека подметнал докази за да ја обвини Москва за нападот.