Русија ја обвини Украина за напад со дронови врз нуклеарната централа во Запорожје

ИСТАНБУЛ (АА) - Русија денес потврди дека Украина извршила напад со беспилотно летало врз нуклеарната централа во Запорожје и градот во близина, Енерходар, јавува Анадолу.

Руското Министерство за одбрана соопшти дека украинската војска вчера ја нападнала нуклеарната централа и градот во близина со осум беспилотни летала, од кои сите биле соборени од руските системи за противвоздушна одбрана.

„Кога едно од соборените беспилотни летала падна, тоа експлодира и се запали на покривот на центарот за обука на Нуклеарната централа Запорожје“, се вели во соопштението, во кое се додава дека нема жртви и дека нивото на радијација е нормално.

Изјавата на Москва следуваше еден ден откако Рафаел Гроси, генерален директор на Меѓународната агенција за атомска енергија (МААЕ), рече дека персоналот на МААЕ во нуклеарната централа слушнал две експлозии.

Гроси во изјавата рече дека Агенцијата сè уште не е во можност да потврди никакво влијание, но е запознаена со извештаите во врска со центарот за обука.

„Нападот на која било нуклеарна централа е целосно неприфатлив“, рече Гроси, повикувајќи на максимална воздржаност за да се спречат заканите за безбедноста на постројките.

Украинските власти сѐ уште не ги коментираа овие тврдења.

Од 1 септември 2022 година, персоналот на МААЕ е присутен во нуклеарната централа Запорожје, најголемата во Европа и една од десетте најголеми во светот, која е под руска контрола од март 2022 година.

Останува загриженоста за можна нуклеарна катастрофа, при што Москва и Киев често меѓусебно се обвинуваат за напади околу комплексот.