Пропалестински бденија низ Австралија со барање за ембарго на оружје за Израел

Пропалестински демонстранти денес се собраа во повеќе австралиски градови, еден ден пред третата годишнина од почетокот на израелската војна во Газа на 8 октомври 2023 година, додека муслиманските организации ја повикаа Канбера да воведе санкции и двонасочно ембарго на оружје за Израел, јавува Анадолу.

Околу 70 активисти се собраа пред Државната библиотека на Викторија во Мелбурн на целодневно бдение, објави „Хералд сан“ од Мелбурн.

На просторот пред библиотеката беа истакнати палестински знамиња. Беше поставена и фигура на израелскиот премиер Бенјамин Нетанјаху како држи натпис „Воен злосторник за геноцид“.

Меѓународниот кривичен суд во ноември 2024 година издаде налог за приведување на Нетанјаху поради воени злосторства и злосторства против човештвото во Газа. Судот го води како лице во бегство.

На скалите пред библиотеката демонстрантите поставија големо палестинско знаме, заедно со фотографии и други материјали, додека на транспарент пишуваше: „Ќе останеме, ќе изградиме повторно“.

Бдението започна според најавениот распоред и требаше да трае до 18 часот по локално време (7 часот по Гринич), а организаторите ги повикаа учесниците мирно да им оддадат почит на Палестинците убиени во Газа.

„Хералд сан“ објави дека за време на собирот дошло до кратки вербални конфронтации, при што организаторите ги повикале демонстрантите да не се вклучуваат во нив. Дополнителни полициски сили биле распоредени откако пристигнале контрадемонстранти.

Во Сиднеј, за вечер е закажано одделно пропалестинско бдение пред Градското собрание, додека друг собир е планиран во Волонгонг, објави австралискиот јавен радиодифузен сервис „Еј-би-си“.

Дополнителни пропалестински протести се најавени низ Австралија в недела.

Сојузот на австралиските муслимани (AAM) и Австралискиот национален совет на имами (ANIC), во соопштение објавено на американската платформа за социјални медиуми X, наведоа дека трите години израелски напади донеле „убиства, уништување, раселување, глад и огромно страдање“ за Палестинците.

Организациите ја повикаа австралиската Влада да воведе „значајни санкции“ против Израел и „сеопфатно двонасочно ембарго на оружје“, како и да обезбеди Австралија да не придонесува „директно или индиректно кон кршење на меѓународното право“.

Тие исто така повикаа на непречен хуманитарен пристап до Газа и поддршка за обновување на цивилната инфраструктура.

Барањето доаѓа во услови на зголемено внимание кон одбранбените врски меѓу Австралија и Израел.

Двете земји во 2017 година потпишаа Меморандум за разбирање за соработка во одбранбената индустрија, додека годишните стратегиски разговори за одбраната започнаа во 2018 година, според австралиското Министерство за надворешни работи и трговија.

Австралија исто така учествува во глобалниот синџир на снабдување за борбените авиони Ф-35 што ги користи Израел, при што повеќе од 70 австралиски компании придонеле со компоненти за програмата. Австралиската Влада, сепак, наведува дека не му испорачува директно оружје или муниција на Израел.

Муслиманските организации наведоа дека признавањето на државата Палестина од страна на Австралија во септември 2025 година било важен чекор, но дека треба да биде проследено со конкретни политички и дипломатски активности.

Од октомври 2023 година, во војната во Газа се убиени повеќе од 74.200 Палестинци, а над 175.200 се повредени, според палестинските податоци.