Португалија го поддржа посредувањето на Пакистан во решавањето на конфликтот на Блискиот Исток

Министерот за надворешни работи на Португалија, Пауло Рангел, денес телефонски разговараше со својот пакистански колега Ишак Дар, при што изрази поддршка за напорите на Пакистан за посредување во решавањето на конфликтот на Блискиот Исток во услови на тековните напади на САД и Израел врз Иран, пренесува Анадолу.

„Португалија ја изразува својата целосна поддршка за посредувањето и преговарачките напори на Пакистан, како и на други пријателски земји во регионот“, соопшти португалското Министерство за надворешни работи на американската компанија за социјални медиуми Х.

Во соопштението се додава дека Рангел ја пофалил „интензивната координација на пакистанската Влада со меѓународната заедница“, споделувајќи сериозна загриженост за глобалните економски последици од конфликтот, како и последиците на хуманитарен план.

Минатиот месец, Дар изјави дека Исламабад би бил „почестен“ да биде домаќин на преговори меѓу САД и Иран како дел од пошироките напори за посредување. Пакистан, исто така, беше домаќин на четиристраниот состанок на министрите за надворешни работи.

САД и Израел од 28 февруари извршуваат воздушни напади врз Иран, при што, според иранските власти, досега загинаа повеќе од 1.400 лица.

Иран возврати со напади со беспилотни летала и ракети насочени кон Израел, како и кон Јордан, Ирак и земјите од Персискиот Залив каде што се наоѓаат американски воени бази.