ДАВИТ КАЧКАЧИШВИЛИ -
Градот Орихив, што се наоѓа во украинската област Запорожје, ги носи тешките траги на војната која трае веќе 6 месеци како резултат на нападите на руските сили, јавува Агенција Анадолија (АА).
Орихив се наоѓа на околу 8 километри од фронтот на линијата во Запорожје, а во него живеат околу 15.000 лица. Овој град е често цел на руските сили.
Скоро е невозможно да се видат луѓе на улиците во овој град поради нападите. На улиците обично може да се забележат војници и полицајци.
Во градот привлекуваат внимание големите штети на зградите, училиштата и општинските згради, како и на инфраструктурата како резултат на нападите.
Градоначалникот на Општина Орихив, Анатолиј Кворостијанов, во изјава за новинарот на АА говореше за нападите што продолжуваат веќе со месеци во градот, нагласувајќи дека последниот напад во градот бил извршен на 11 август.
Кворостијанов рече дека градот е често погоден од проектили лансирани од страна на руските сили, кои според него продолжуваат да го напаѓаат градот и од копно и од воздух.
Тој тврди дека во рамки на нападите се користени и некои забранети ракети, како фосфорна бомба.
Кворостијанов истакна дека три села при Орихив сега засега се под контрола на руските сили.
Тој информира дека поголемиот дел од жителите на градот се преселиле во побезбедни места по почетокот на војната.
„Според сегашните податоци, во центарот на градот и во околните населени места живеат околу 6.000 цивили. Како резултат на нападите загинаа 20 лица, додека стотици лица се повредени. Луѓето се враќаат, но опасноста сè уште постои“, додаде Кворостијанов.
