Неколку лица, меѓу кои и деца, убиени во пукање и пожар во Монтана

Неколку лица, меѓу кои и деца, се убиени откако вооружен напаѓач отворил оган во куќа во американската сојузна држава Монтана, соопштија властите вчера, пренесуваат медиумите, јавува Анадолу.

Полицијата го опиша инцидентот што се случил во неделата вечерта во близина на населбата Вест Енд, во градот Билингс, како семејно нарушување на јавниот ред и мир.

Напаѓачот починал од самонанесена прострелна рана откако ја запалил куќата, објави „Ен-би-си“ вчера.

Привремениот шериф на округот Јелоустоун, Кент О’Донел, вчера изјави дека во куќата загинале „повеќе возрасни лица и повеќе малолетници“.

Загинатите се идентификувани, но нивниот број, имињата и возраста сè уште не се објавени.

„Поради пожарот и, очигледно, водата што се користи за негово гаснење, нашата истрага на местото на злосторството и собирањето докази ќе се одвиваат побавно“, рече тој. „Затоа бараме трпение додека ја завршиме истрагата.“

О’Донел рече дека полицијата реагирала на пријава за пукање на улицата „Вајт Стар Серкл“, откако лице што се јавило на бројот 911 пријавило дека слушнало истрели.

Полицајците пристигнале околу 10 минути подоцна и слушнале истрели од задниот дел на куќата. Три минути потоа, објектот бил целосно зафатен од пламен.

На местото биле испратени пожарникари, но, како што се наведува, се соочиле со ограничен пристап до вода и со помал број хидранти од потребното.

„Доцнењето и ограничениот пристап претставуваа значителни предизвици, условите за пожарот продолжија да се влошуваат, а жителите на крајот беа … проголтани од пожарот“, изјави началникот на противпожарната служба на Билингс, Мет Хопел.

Причината за пожарот сè уште се истражува.

Полицискиот наредник Џеф Стовал рече дека некои детали се задржуваат во тајност „за да се заштити интегритетот на тековната истрага“.

„Постојат детали што едноставно не можеме да ги објавиме во овој момент“, рече тој.