Најмалку четири слики украдени од музејот на Реноар во јужна Франција

Најмалку четири слики се украдени од Музејот на Огист Реноар во јужна Франција во кражба што се случила синоќа, објавија денес локалните медиуми, пренесува Анадолу.

Двајца крадци провалиле во музејот во Кањ-сур-Мер, во близина на Ница, кршејќи стаклена врата, според францускиот весник „Фигаро“, повикувајќи се на полициски извори.

Снимките од безбедносните камери покажале дека осомничените ги вадат сликите од своите рамки пред да се активира безбедносниот аларм во 5:48 часот наутро по локално време.

Крадците избегале со четири слики пред да пристигне полицијата, додека властите сè уште ја проценуваат целосната штета.

Истражителите пронајдоа две торби со патент во градината на музејот кои можеби им припаѓале на крадците.

Истрагата ја води Поддирекцијата за борба против организиран криминал и специјализирана деликвенција.

Сместен во Ле Колет, последната резиденција на францускиот сликар Пјер-Огист Реноар, кој припаѓа на школата на импресионизмот, музејот содржи околу 10 оригинални слики од уметникот и приближно 40 скулптури, како и неговиот мебел, лични предмети, фотографии и архиви.