Најмалку 50 китови насукани на брегот на Нов Зеланд, неколку угинати

Најмалку 50 китови се насукале покрај брегот на Нов Зеланд, а спасувачите и локалните жители денес работат на враќање во морето на оние што сè уште се живи, објавија локалните медиуми, пренесува Анадолу.

Китовите од видот пилот-кит биле пронајдени заробени меѓу карпи покрај крајбрежјето на Нгави, во регионот Ваирарапа, во југоисточниот дел на Северниот Остров на земјата, објави Радио Нов Зеланд, повикувајќи се на организацијата за заштита на китовите „Проект Јона“.

Два од насуканите китови успешно биле вратени во морето, додека неколку други умреле, според наводите.

Од „Проект Јона“ соопштија дека нивниот тим врши процени на здравствената состојба на насуканите китови.

Организацијата во објава на Фејсбук наведе дека медицински тимови специјализирани за морски цицачи биле мобилизирани во координација со персоналот на Одделот за заштита на природата на Нов Зеланд и локалните жители.

Роб Барг, жител на Нгави, ја опиша ситуацијата како трагична.

„Ужасно е. Оние што се живи се на последниот здив“, рече тој.

Рибарот Ендру Сим изјави дека спасувачите се обидуваат да ги одржат влажни и разладени неколкуте преживеани китови, но смета дека „поголемиот дел од групата им подлегнал на повредите“.

Радио Нов Зеланд, исто така, објави дека вработените во Одделот за заштита на природата и локалната заедница ќе им дадат имиња на китовите и ќе изведат каракија, традиционална молитва на Маорите.