Nur Asena Ertürk
17 Мај 2023•Ажурирај: 18 Мај 2023
АНКАРА (АА) - Апелациониот суд во Париз денес ја потврди тригодишната затворска казна на поранешниот француски претседател Никола Саркози, одбивајќи ја неговата жалба против пресудата за корупција и трговија со влијание од 2021 година, пренесува Анадолу.
Саркози, кој ја водеше земјата од 2007 до 2012 година, и неговиот адвокат Тиери Херцог беа обвинети за поткуп на Гилберт Азиберт, поранешен судија во Касациониот суд, во 2014 година за да им даде информации за судска истрага.
Саркози во замена му ветил на судијата престижна функција во Монако, пишува дневниот весник „Монд“.
Судот го осуди поранешниот претседател на три години затвор, со две години условно, на 1 март 2021 година, соопшти телевизијата БФМТВ.
Саркози бараше укинување на пресудата, но Апелациониот суд во Париз ја потврди казната што се однесува и на другите двајца обвинети.
Станувајќи прв француски претседател осуден за такви обвиненија, Саркози се соочува и со тригодишно ограничување на неговите граѓански права, што го прави неподобен да се кандидира за јавна функција во тој период.
Според БФМТВ, ќе му биде дозволено да го одлежи времето дома, носејќи електронска алка за преостанатата година наместо да оди в затвор.
Неговиот адвокат Херцог, исто така, доби три години забрана за правна работа.
