Медиуми: Трамп изнесе „лажни“ и „непоткрепени“ тврдења за војната со Иран

Американскиот претседател Доналд Трамп изнесе серија „лажни“ и „непоткрепени“ тврдења за конфликтот со Иран и неговото надворешнополитичко минато за време на последната прес-конференција, се наведува во анализата за проверка на фактите објавена на „Си-ен-ен“, јавува Анадолу.

„Си-ен-ен“ објави дека Трамп го повторил демантираното тврдење пред долго време дека повикал на убиство на Осама бин Ладен во книга објавена во 2000 година.

Во споменатата книга Бин Ладен се споменува само попатно, а лидерот на Ал-Каеда беше убиен во 2011 година во американска операција наредена од тогашниот претседател Барак Обама.

Трамп, исто така, неточно тврдеше дека повеќето загуби на американски авиони во конфликтот со Иран се должат на „пријателски оган“.

„Си-ен-ен“извести дека повеќе авиони биле соборени од ирански оган, вклучувајќи Ф-15 и А-10, додека набљудувачки авион E-3 бил уништен во посебен напад.

Претседателот дополнително го повтори тврдењето дека тој „ставил крај на осум војни“, што „Си-ен-ен“ го оцени како лажно, истакнувајќи дека некои од наведените конфликти не биле војни или воопшто не завршиле.

Трамп ги обнови и непоткрепените обвинувања дека венецуелскиот лидер Николас Мадуро испратил голем број затвореници во САД. Експертите претходно за „Си-ен-ен“ изјавија дека не постојат докази кои го поддржуваат ова тврдење.

Дополнително, Трамп го преувеличи бројот на американските војници кои се наоѓаат во Јужна Кореја и го повтори лажното тврдење дека поранешната потпретседателка Камала Харис никогаш не ја посетила границата меѓу САД и Мексико.

„Си-ен-ен“ нагласи дека и некои други тврдења на Трамп не можеле да бидат независно проверени и потврдени.