Ikrame Imane Kouachi
28 Октомври 2026•Ажурирано: 28 Октомври 2026
По затворањето на избирачките места во Израел и додека политичките лидери се обидуваат да обезбедат поддршка за формирање нова Влада, лидерот на партијата „Израел Бејтену“ рано утринава повика на „бунт“ во рамките на Ликуд против нејзиниот лидер, премиерот Бенјамин Нетанјаху, обвинувајќи го дека го „уништил националниот табор“, објави израелскиот „Канал 12“, пренесува Анадолу.
„Едно нешто стана јасно денес: премиерот Бенјамин Нетанјаху се однесуваше како лидер на криминална организација, ни помалку ни повеќе. Ги премина сите црвени линии“, рече Авигдор Либерман по завршувањето на гласањето на неизвесните парламентарни избори вчера.
Тој повика на бунт во Ликуд, велејќи: „Добив десетици повици од моите пријатели во Ликуд. Овој човек мора да ја напушти политичката сцена“.
„Подигнете го знамето на бунтот во Ликуд и кажете го гласно тоа што веќе го мислите. Нетанјаху го уништи националниот табор“, додаде тој.
Повикот на Либерман за бунт во Ликуд има дополнителна тежина со оглед на неговото категорично противење на формирањето малцинска Влада што би се потпирала на „заштитна мрежа“ обезбедена од арапските пратеници. Ова е опција што опозициските партии би можеле да ја разгледаат доколку не успеат да обезбедат мнозинство од 61 место.
Затоа, неговиот потег може да се толкува како обид да се отвори алтернативен пат за формирање Влада предводена од Гади Ајзенкот, преку привлекување одреден број пратеници на Ликуд кои се ориентирани кон десниот центар и нивно дистанцирање од Нетанјаху.
Доколку напорите успеат да привлечат доволно пратеници на Ликуд, блокот на Ајзенкот, во кој е и партијата на Либерман, би можел да формира парламентарно мнозинство без поддршка од арапските партии и без учество на Нетанјаху или на двете партии – „Еврејска моќ“, предводена од министерот за национална безбедност од екстремната десница Итамар Бен-Гвир и Религиозниот ционизам, предводена од министерот за финансии Безалел Смотрич.
Излезноста на изборите во вторникот достигна 77,7 отсто, што е зголемување од 7,1 процентен поен во однос на изборите во 2022 година. Изборните власти соопштија дека ова е највисока излезност од 1999 година.
Анкетите за излезност објавени од израелските медиуми покажаа дека блокот на Нетанјаху е во водство пред опозициската алијанса, но ниту еден од нив не ги обезбеди 61 место потребни за мнозинство во 120-члениот Кнесет.
Официјалните резултати се очекува да бидат објавени на 4 ноември.
