Либиската министерка за надворешни работи со европските колеги разговараше за напорите за стабилизација

ТРИПОЛИ (АА) - Министерката за надворешни работи на Владата на Либиското национално единство, Неџла ел Менгуш, се состана со својот француски, германски и италијански колега кои беа во официјална посета на Либија, јавува Агенција Анадолија (АА).

Министерката Менгуш во главниот град Триполи одржа заедничка прес-конференција со францускиот министер за надворешни работи, Жан-Ив Ле Дриан, германскиот министер за надворешни работи, Хаико Мас и италијанскиот министер за надворешни работи, Луиџи ди Мајо.

Менгуш истакна дека стабилноста на Либија ќе има позитивни последици за стабилноста на Европа, како и на земјите од регионот.

Истакнувајќи дека во стратегијата за надворешна политика на Владата на национално единство принципот на суверенитет на Либија не може да биде предмет на расправа, Менгуш рече: „Нагласуваме дека сите платеници треба итно да ја напуштат земјата.“

Менгуш исто така рече дека со нејзините европски колеги се сретнала заради потребата од забрзување на отворањето на амбасадите и конзулатите во Либија.

„Преземени се низа важни чекори за постигнување стабилност и суверенитет во Либија“, рече францускиот министер за надворешни работи, Ле Дриан.

Наведувајќи ја потребата од воспоставување на прекин на огнот во Либија, Ле Дриан рече дека се тука за да ги поддржат либиските власти.

Германскиот министер Мас, истакнувајќи ја неопходноста од повлекување на платениците како предуслов за подготовка за претстојните избори во земјата, рече дека Европската Унија (ЕУ) ќе продолжи да го следи ембаргото за оружје за Либија.

Министерот на Италија, Ди Мајо, нагласувајќи дека денеска се во Триполи за да, како ЕУ бидат сведоци на мировниот процес во Либија, рече: „Доколку либиските власти побараат, ние сме за тоа Европа да учествува во Механизмот за набљудување на прекин на огнот во координација со ОН.“

Истакнувајќи дека ги ценат напорите на Либија да управува со приливот на нелегалната миграција, со трговците со луѓе и контролата на границите, Ди Мајо рече: „Но, ние исто така очекуваме [Либија] да гарантира целосно почитување на основните човекови права.“

Како резултат на гласањето на Либискиот форум за политички дијалог, што се одржа под раководство на Обединетите нации (ОН) за решение на либиската криза, на 5 февруари, Мохамед ал Менфи беше избран за претседател на претседателскиот Совет, додека Абдулхамид Дибејбе беше избран за премиер на Владата на национално единство.

Дибејбе, кој ја презеде Владата од поранешниот премиер Фаиз ес Сараџ на 16 март, за министерка за надворешни работи ја постави Неџла ел Менгуш.