Кремљ ги отфрли наводите за вмешаност на Русија во немирите во Европа

Никој сериозно не ги сфаќа „апсурдните обвинувања“ за вмешаност на Русија во немирите во Европа, изјави денес портпаролот на Кремљ, Дмитриј Песков, пренесува Анадолу.

„Никој, никаде, веќе не ги сфаќа сериозно ваквите апсурдни обвинувања. Дури ни во самата Европа“, изјави Песков за „Ѕвезда њуз“.

На 17 октомври во Париз и во други француски градови започнаа масовни протести, при што на одредени локации мирните демонстрации прераснаа во немири.

Според јавувањата, демонстрантите запалиле општински згради, ограбиле продавници и нападнале полициски станици.

Песков, исто така, изјави дека рускиот претседател Владимир Путин ги поддржал предлозите на премиерот Михаил Мишустин за реконструкција на Владата.

Тој наведе дека Мишустин ги претставил предлозите за време на работната средба со Путин, одржана утрово.

Песков не прецизираше кои владини функционери ќе бидат опфатени со промените. Согласно со Уставот, Мишустин ќе ги достави соодветните предлози за именувања до Државната дума на одобрување.

На прашањето дали се очекува индискиот премиер Нарендра Моди да ја посети Русија до крајот на оваа година или во 2027 година, Песков одговори дека посетата најверојатно ќе се реализира следната година.

Врз основа на Декларацијата за стратегиско партнерство меѓу Русија и Индија од 2000 година, лидерите на двете земји се среќаваат секоја година. Според утврдениот редослед на ротација, на ред за посета на Русија е Моди.

Песков, исто така, најави дека традиционалниот настан на рускиот претседател Владимир Путин, кој опфаќа директно вклучување на граѓаните и годишна прес-конференција, е закажан за декември.