Имамот на џамијата Ал Акса: Дозволете им на муслиманите во текот на Рамазан да извршуваат молитва намира

КУДС (АА) – ЕНЕС ЏАНЛИ -

Имамот и хатиб на џамијата Ал Акса во окупираниот Источен Ал-Кудс (Ерусалим), Екрима Сабри, порача дека на муслиманите треба да им се дозволи во текот на Рамазан да извршуваат молитва намира, јавува Анадолу.

Со доаѓањето на месецот Рамазан, сите очи се вперени во џамијата Ал Акса, третото најсвето место за муслиманите, кое се наоѓа во окупираниот Источен Ал-Кудс.

Продолжуваат израелските напади врз Појасот Газа, кои траат од 7 октомври минатата година. Продолжуваат и рациите и упадите на Западниот Брег.

Во сенка на нападите врз Газа, зголемена е загриженоста за израелските ограничувања за џамијата Ал Акса за време на Рамазан и можните инциденти што може да се случат таму.

Во интервју за Агенција Анадолу, Сабри ги повика муслиманите да извршуваат молитва во џамијата Ал Акса и ги критикуваше ограничувањата на Израел за Палестинците кои сакаат да дојдат на ова свето место.

Тој истакна дека израелските власти давале контрадикторни изјави за тоа кој и кои возрасни групи можат да клањаат во Ал Акса, како тие да се сопственици на џамијата.

„Муслиманите треба да бидат во можност да дојдат на ова свето место за време на Рамазан без никакви пречки и грижи. Илјадници и десетици илјади луѓе кои сакаат да извршат секојдневни молитви, џума и терави намаз на ова свето место во овој свет месец“, порача Сабри.

Тој нагласи дека Израел сака да го зголеми притисокот врз Ал Акса за време на Рамазан, покрај неговата војна во Газа.

„Израел е алчен за доминација над џамијата Ал Акса и може да прибегне кон изненадувачки практики овој Рамазан. Муслиманите мора да бидат будни и внимателни. Постојат индикации дека Израел ќе воведе старосни ограничувања за оние кои сакаат да клањаат во Ал Акса. Освен израелската окупација, нема земја што воведува старосни ограничувања за местата за богослужба“, истакна Сабри.

Нагласувајќи дека израелскиот министер за национална безбедност од крајната десница, Итамар Бен-Гвир, може да прибегне кон „провокативни методи“ за време на Рамазан, Сабри рече дека израелските политичари се обидуваат да создадат негативна перцепција прикажувајќи го Рамазан како „месец на насилството“.

„Светиот месец Рамазан е месец на обожавање, итикаф и Светиот Куран. Искривувањето на месецот Рамазан од страна на некои западни земји му дава можност на Израел да ги спречи муслиманите да одат во Ал Акса“, рече Сабри.

Привлекувајќи внимание на хуманитарната катастрофа во Газа поради непрекинатото израелско бомбардирање и блокада, Сабри рече: „Примирјето и прекинот на војната се неопходни за да се спречи понатамошно крвопролевање и да се спасат животи. На овој начин луѓето можат да се молат во мир, далеку од катастрофи и несреќи.“

Тој истакна дека Ал-Кудс е уништен поради војната во Газа.

„За време на Рамазан куќите во Ал-Кудс беа украсени, се настојуваше да се покаже и сподели радоста на Рамазан. Поради војната луѓето не го прават тоа, но ќе се молат. Постот е еден од столбовите на исламот“, рече Сабри.

Истакнувајќи дека треба да се избегнуваат екстравагантноста и непотребното трошење за време на Рамазан, Сабри ги советуваше богатите муслимани да мислат на сиромашните и на оние кои имаат потреба преку зекатот, фитрот и милостината.