Еврејски доселеници запалија женска сала за молитва во џамија на окупираниот Западен Брег

Група израелски доселеници утринава ја запалија женската сала за молитва во џамијата во селото Џилџилија, во централниот дел на окупираниот Западен Брег, а на нејзините ѕидови со спреј испишаа слогани на хебрејски јазик, јавува Анадолу.

Група доселеници упаднаа во селото взори и ја запалија џамијата, соопштија локални извори за Анадолу.

Во пожарот целосно е уништен просторот за молитва на жените, а предизвикана е штета и на надворешниот дел на џамијата, наведуваат изворите.

Тие додаваат дека во последно време во Џилџилија се забележува ескалација на нападите од страна на доселениците.

Минатиот месец доселениците упаднаа во селото и украдоа стадо овци.

Израелската армија и доселениците ги интензивираа нападите врз Палестинците и нивниот имот на окупираниот Западен Брег. Тие ги извршуваат насилствата најчесто преку подметнување пожари, одземање земјиште и спречување на локалните земјоделци да стигнат до своите ниви, особено во подрачјата што се наоѓаат во близина на израелските населби и воени пунктови.

Според официјалните палестински податоци, во израелските напади на Западниот Брег од 8 октомври 2023 година досега загинаа 1.169 Палестинци, а 12.666 се повредени.

Во овој период приведени се околу 23.000 лица, а 33.000 луѓе беа принудени да ги напуштат своите домови.