Во израелски напад врз Западен и Јужен Либан убиени седум лица, петмина повредени

ИСТАНБУЛ (АА) – Најмалку седум лица се загинати, а петмина се повредени денес во израелските напади врз западниот и јужниот дел на Либан, пренесува Анадолу.

Националната новинска агенција (ННА) соопшти дека рано утринава загинале две лица, а петмина се повредени во напад врз градот Машгара, во западна Бека.

Во Јужен Либан, израелско беспилотно летало погодило возило во близина на кружниот тек Кфар Руман во подрачјето на Набатије, при што загинати се четири лица во автомобил, а автомобилот е зафатен од пламенот, се наведува во соопштението.

Дрон ја гаѓал и околината на бензинска пумпа близу истото подрачје, соопшти агенцијата.

Според државната агенција ННА, едно лице загинало при напад во близина на болницата „Гандур“ во Набатије ал-Фавка.

Израел спроведува воздушни напади и копнена офанзива врз Јужен Либан по прекуграничните напади од либански Хезболах на 2 март и покрај прекинот на огнот што стапи на сила во ноември 2024 година.

Според податоците на Министерството за здравство, бројот на загинати во израелските напади врз Либан од 2 март досега се искачи на 1.461 лице, а 4.430 се повредени.

Хезболах стрела бараж од ракети кон Израел од почетокот на март, наведувајќи дека нападите се одговор на континуираните израелски напади врз Либан, како и на убиството на тогашниот врховен лидер на Иран, ајатолахот Али Хамнеи, во заедничкиот американско-израелски воздушен напад на 28 февруари.