Во израелски воздушни напади погодени 10 железнички линии и мостови низ Иран

Во израелски воздушни напади денес се погодени 10 железнички линии и мостови низ Иран, неколку часа откако Израел упати закани за напад на железничката инфраструктура во земјата, јавува Анадолу.

Израелското воено радио тврди дека цел на нападите биле локации што наводно се користеле за транспорт на оружје, како и платформи за лансирање ракети.

Иранските медиуми известија за американско-израелски напади врз железничката инфраструктура во повеќе области низ земјата.

Засега сѐ уште нема информации за евентуални жртви или за предизвикана штета.

Нападите се случија само неколку часа откако израелската војска ги предупреди Иранците да не патуваат со воз и да ги избегнуваат железничките станици низ земјата.

Регионалните ескалации продолжуваат со ист интензитет откако САД и Израел започнаа заедничка офанзива против Иран на 28 февруари, во која досега загинаа над 1.400 луѓе, меѓу кои и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што има американски воени бази, предизвикувајќи жртви и штета на инфраструктурата и нарушувајќи ги глобалните пазари и авиосообраќајот.