Beyza Binnur Dönmez
08 Октомври 2026•Ажурирано: 08 Октомври 2026
Велика Британија денес соопшти дека нејзиниот конзулат во окупираниот Источен Ерусалим ќе остане отворен под ново име – „Мисија на Обединетото Кралство – Ерусалим“ – и покрај израелската наредба за негово затворање поради забраната за трговија со производи од нелегалните израелски населби, пренесува Анадолу.
Во објава на американската платформа за социјални медиуми X, министерот за надворешни работи Ед Милибанд рече дека Лондон не го признава правниот авторитет на Израел да го затвори Конзулатот, кој постои речиси 200 години.
„По разговорите со Владата на Израел, зградата на нашиот Генерален конзулат нема да се затвори и од денес ќе биде позната како ’Мисија на Обединетото Кралство – Ерусалим‘“, рече тој.
Милибанд истакна дека мисијата ќе остане оперативна и ќе продолжи да обезбедува услуги и да соработува со Палестинците, потврдувајќи го ставот на Велика Британија дека Источен Ерусалим е окупирана територија.
„Мисијата на Обединетото Кралство – Ерусалим е независна, оперативна и ќе продолжи да обезбедува важни услуги и да ја спроведува нашата работа со палестинскиот народ“, рече тој.
Додаде дека Велика Британија привремено повлекла дел од персоналот и нивните семејства од безбедносни причини и дека нема да преземе мерки за одмазда додека траат разговорите.
„Во наредните месеци ќе работиме на зајакнување на нашето присуство и нема да преземеме реципрочни дејства додека таквите разговори се во тек и се кредибилни“, рече министерот за надворешни работи.
Милибанд ја потврди посветеноста на Велика Британија кон мерките воведени на 8 септември, наведувајќи дека тие се преземени како поддршка за дводржавното решение чија цел е обезбедување мир за Израелците и за Палестинците.
Тој се осврна на британските санкции насочени кон нелегалните израелски населби на окупираниот Западен Брег, вклучително и забраната за увоз на производи од населбите, што го поттикна Израел да нареди затворање на Конзулатот во рок од 30 дена – рок што истекува денес.
Сепак, израелскиот министер за надворешни работи Гидеон Сар изјави дека Конзулатот престанал со работа и дека 20 британски дипломати, вклучително и генералниот конзул, ќе го напуштат Израел.
Сар рече дека Израел одобрил останување на само седум дипломати во зградата, со значително ограничени активности.
Тој додаде дека зградата во која се наоѓа Конзулатот е сопственост на британската Влада и дека Израел му дозволил на Лондон таму да задржи тим од само седум дипломати, со „значително ограничен опсег на активности“. Двете страни соопштија дека се договориле да продолжат со разговорите.
Како што јави дописникот на Анадолу од терен, денес вработените ги отстраниле ознаките од Генералниот конзулат на Обединетото Кралство во Источен Ерусалим. Налогот за затворање не се однесува на Амбасадата на Обединетото Кралство во Тел Авив.
