Најмалку 503 загинати, 5.700 повредени во нападите на САД и Израел врз главниот град на Иран

ИСТАНБУЛ (АА) – Најмалку 503 лица се убиени, а околу 5.700 се повредени во нападите на Соединетите Американски Држави (САД) и Израел врз иранската престолнина Техеран од крајот на минатиот месец, изјави денес директорот на Службата за итни случаи на покраината Техеран, пренесува Анадолу.

Мухамед Есмаил Таваколи за новинската агенција ИСНА изјави дека повеќето од убиените се цивили, меѓу кои и 12 деца на возраст меѓу два месеца и 12 години.

Регионалната ескалација започна откако Израел и САД на 28 февруари започнаа заеднички напади врз Иран. Во овие операции досега загинаа околу 1.300 луѓе, меѓу кои и тогашниот врховен водач на Иран, ајатолахот Али Хамнеи.

Техеран возврати со серија напади со беспилотни летала и ракети насочени кон Израел, како и кон Јордан, Ирак и земјите од Персискиот Залив. Иранските власти соопштија дека цел на овие напади се американските воени бази во регионот.