Напад со беспилотно летало предизвика пожар во кувајтската рафинерија за нафта „Мина ал-Ахмади“

ИСТАНБУЛ (АА) - Нападот со беспилотно летало рано утринава предизвика пожар во делови на нафтената рафинерија „Мина ал-Ахмади“ во Кувајт, соопшти Кувајтската нафтена корпорација, јавува Анадолу.

Екипите за итни интервенции и противпожарните тимови ги активираа плановите за одговор и работат на ставање на пожарот под контрола и спречување на ширење, изјавија од корпорацијата за кувајтската државна новинска агенција КУНА.

Нема известувања за повредени лица, а преземени се сите мерки на претпазливост за заштита на работниците и објектите.

Од корпорацијата додадоа дека се во координација со Јавната управа за животна средина за следење на квалитетот на воздухот во околните подрачја, при што досега не се забележани негативни влијанија врз животната средина.

Регионот е во состојба на зголемена готовност откако САД и Израел на 28 февруари започнаа воздушна офанзива, при што, според достапните информации, загинале повеќе од 1.340 лица, меѓу кои и тогашниот врховен лидер на Иран, ајатолахот Али Хамнеи.

Иран возврати со напади со дронови и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази. Во нападите има жртви и предизвикана е материјална штета, како и нарушувања на глобалните пазари и авиосообраќајот.