Лидерката на Црквата на обединување во Јужна Кореја осудена на две години затвор за корупција

Лидерката на контроверзната Црква на обединување во Јужна Кореја денес беше осудена на две години затвор во корупциски случај поврзан со поранешната прва дама Ким Кон-хи, објавија локалните медиуми, пренесува Анадолу.

Хан Хак-џа (83), вдовицата на основачот на црквата, Сон Мјонг-мун, беше обвинета дека преку посредник во јули 2022 година ѝ дала луксузен ѓердан и чанта „Шанел“ на Ким, барајќи услуги за црквата, објави „Јонхап њуз“.

Хан, која беше приведена минатата година, се соочува со повеќе точки од обвинението поднесено од специјален обвинител, меѓу кои и за „мешање на религијата и политиката“.

Судот ги прогласи Хан и други лица за виновни за предавање подароци на Ким во рамките на, како што обвинителството го опиша, „двонасочен“ обид за добивање услуги во врска со прашања поврзани со Црквата на обединувањето, објави дневниот весник „Чосун“.

Во јануари Ким беше осудена на 20 месеци затвор за примање луксузни подароци од црквата во замена за политички услуги. Апелацискиот суд во април ја зголеми нејзината казна на четири години откако ја прогласи за виновна по дополнителни обвиненија, меѓу кои и за примање уште една чанта „Шанел“ и манипулирање со цените на акциите.

Ким е сопруга на поранешниот претседател Јун Сук-јеол, кој беше разрешен од функцијата од Уставниот суд во април 2025 година откако Парламентот го отповика поради неговата краткотрајна одлука за прогласување воена состојба во декември 2024 година.