Вкупно 15 брода го поминале Ормускиот Теснец во последните 24 часа по добиена дозвола од Иран

Вкупно 15 брода поминале низ Ормускиот Теснец во последните 24 часа откако претходно добиле дозвола од Иран, објавија вчера иранските медиуми, пренесува Анадолу.

Полудржавната новинска агенција „Фарс“ соопшти дека на бродовите им бил дозволен премин низ овој стратегиски воден пат по добиеното одобрение од иранските власти.

Според агенцијата, поморскиот сообраќај низ теснецот и понатаму е за 90% помал во споредба со периодот пред САД и Израел да ги започнат нападите врз Иран кон крајот на февруари.

Регионот е во состојба на готовност откако САД и Израел започнаа заедничка офанзива врз Иран на 28 февруари, во која досега загинаа повеќе од 1.340 луѓе, вклучително и тогашниот врховен лидер ајатолахот Али Хамнеи.

Иран возврати со напади со беспилотни летала и ракети насочени кон Израел, Јордан, Ирак и земјите од Персискиот Залив каде што се наоѓаат американски воени бази, предизвикувајќи жртви и уништување на инфраструктурата, истовремено нарушувајќи ги глобалните пазари и авиосообраќајот.