Бројот на смртни случаи поврзани со мали сипаници се искачи на 1.030, во Бангладеш починаа уште осум деца

Бројот на смртни случаи поврзани со мали сипаници и симптоми слични на нив се искачи на 1.030 во Бангладеш откако денес починаа уште осум деца, соопштија властите, јавува Анадолу.

Според Генералниот директорат за здравствени услуги (ДГХС) при Министерството за здравство, четворица од новопочинатите биле од главниот град Дака.

Само во областа Дака се регистрирани вкупно 482 смртни случаи.

Во меѓувреме, бројот на лица со симптоми достигна 172.720, а бројот на потврдени случаи изнесува 20.124.

Според Светската здравствена организација (СЗО), оваа густо населена јужноазиска земја со 175 милиони жители се соочува со тешкотии во сузбивањето на епидемијата поради нискиот опфат со вакцинација.

Од СЗО наведуваат дека Бангладеш во минатото имал колективен имунитет против мали сипаници, но го изгубил во последните години поради опаѓањето на опфатот со вакцинација.

Од април досега Министерството за здравство има вакцинирано речиси 19,4 милиони деца преку посебна програма, покрај редовните вакцинации.