„Бог нека ги отвори границите, нека ги сруши ѕидовите“, рече папата Лав XIV критикувајќи ги националистичките политики

САРАЕВО (АА) - Папата Лав XIV денес ја критикуваше појавата на националистички политички движења во светот, нарекувајќи ги жални, но не именуваше ниту една земја или поединец, пренесува Анадолу.

Папата Лав XIV го кажа тоа на миса пред десетици илјади верници на плоштадот Свети Петар и се помоли Господ да ги отвори границите, да ги сруши ѕидовите и да ја растера омразата, известува ХИНА.

„Нема место за предрасуди, безбедносни зони што нè одделуваат од нашите соседи, за ексклузивното размислување што, за жал, сега се појавува во политичките национализми“, рече тој додека ја водеше мисата на празникот Педесетница (Духовден), еден од најважните црковни празници.

Папата Лав XIV е поранешен кардинал Роберт Превост, кој беше избран на 8 мај за наследник на папата Франциск на чело на Римокатоличката црква и Ватикан.

Пред да стане папа, Превост не се воздржуваше од критикување на американскиот претседател Доналд Трамп, споделувајќи бројни објави во кои изразува несогласување со Трамп и потпретседателот Џеј-Ди Венс на социјалните мрежи во текот на изминатите неколку години.

И папата Франциск беше остар критичар на Трамп. Во јануари, тој ја нарече за срамна најавата на Трамп за депортирање на милиони мигранти од САД. Во еден момент, тој дури рече и дека Трамп „не е христијанин“ поради неговите ставови за имиграцијата.

„Лице кое размислува само за градење ѕидови, какви и да се тие, а не за градење мостови, не е христијанин“, рече папата Франциск за Трамп во 2016 година.